Saatlıda kənd məktəbinin şagirdi buraxılış imtahanında 300 bal toplayıb
Tam (11 illik) orta təhsil səviyyəsi üzrə martın 10-da keçirilmiş buraxılış imtahanının nəticələrinə görə yüksək bal toplayan şagirdlərdən biri də Saatlı rayonunun Varxankənd məktəbinin şagirdidir.
Saatlı rayonu Ə.Şüküroğlu adına Varxankənd tam orta məktəbinin şagirdi Leyla Səfərova buraxılış imtahanında 300 bal toplamaqla, ən yüksək nəticə göstərən şagirdlərdəndir.
O, imtahanda yüksək nəticə göstərməsində müəllimlərinin rolunun böyük olduğunu bildirib: “Müəllimlərimə minnətdaram. Həm müəllimlərim, həm də məktəbin rəhbərliyi mənə daim dəstək olub. İmtahanda uğur qazanmaq üçün sistemli çalışmışam. Çalışırdım ki, həmişə vaxtımı düzgün bölüm, imtahana qədər mövzuları oxuyub bitirim. İmtahan nəticələri çıxanda çox həyəcanlı idim. Bu, mənim üçün çox gözəl nəticə oldu”.
